日本喺世界盃打入最後16強，打起咗本田圭佑，部份日本兵亦喺決賽周後毅然離開自己國家向外闖，希望幹一番事業。不過，球季開始後，呢啲新加入歐洲戰團嘅「藍武士」似乎唔多順利。
我求大俠最近睇番漫畫《足球小將Roadto2002》篇，故事開頭講主角大空翼加盟巴塞隆拿，卻被貶到預備組，而日向小次郎亦喺祖雲達斯吃盡苦頭，兩人初到歐洲並非一帆風順。至於真實世界，世盃後投身海外嘅日本兵同樣落筆打三更，好似加盟德甲多蒙特嘅香川真司，日前喺聯賽「地標戰」雖然有唔錯嘅表現，但球隊仍然喺主場淨吞利華古遜兩蛋；而效力史浩克04嘅內田篤人，首次亮相德甲亦輸波收場，被漢堡打敗。
不過，香川同內田都唔及國家隊正選門將川島永嗣慘情，因為佢喺比甲受盡挫折，喺剛過去嘅一周聯賽繼續替升班馬利亞斯上陣，結果輸俾哥積克1:2，季初4場聯賽把關全部輸晒，失咗8球。雖則話因為啲隊友實力平平先搞到川島永嗣頻頻失波，但相信佢嘅比賽信心難免會受到影響。
阿部勇樹勢投李斯特城
目前，新一批外流歐洲嘅日本球員仲未亮相嘅，就只有加盟意甲切塞納嘅長友佑都，可唔可以替「藍武士」爭番一口氣，周末意甲開鑼後自有分曉。不過，亦有日本兵唔怕喺歐洲沉淪，趁轉會窗未關閉前決定向外闖，就好似效力浦和紅鑽嘅日本國腳阿部勇樹，已表態投身英格蘭，加盟英冠球隊李斯特城。英冠比起英超當然次一級，但都好講求體力化踢法，如果阿部喺李城安排踢中堅，而唔係喺國家隊嘅防中位置，對住啲歐洲大隻佬真係前景唔樂觀。