小妹呢幾日對眼好攰，因為晚晚用好多時間喺新寵度，當然唔係小白臉啦，係部iPhone4呀。（同事話係因為我日日晒嘢，晒到眼攰喎。）不過，前幾晚就俾部iPhone4搞到冇覺好瞓。
事緣嗰晚屋企部無線router突然間壞咗，部電腦唔可以無線上網，要插寬頻線先上到。我一直以係個舊款router壞咗，因為都用咗幾年，但又唔忿氣想搞番好佢，睇真啲原來部電腦有個訊息，話個router除咗因為壞咗上唔到網，仲可能係受到外界干擾。
電磁波比較強
呢排除咗係鬼節，就係買咗部新iPhone4，睇怕都唔會係有靈界朋友干擾，咁唔通真係iPhone？姑且熄咗部手機嘅WiFi功能，然後放遠啲，點知router即刻work，電腦可以無線上網。
喺facebook發現幾個朋友都話router壞，部份都係用iPhone4嘅。即刻請教城大電子工程系副教授鄭利明，佢話有咁嘅可能，皆因iPhone嘅電磁波比較強，所以會干擾到一啲電磁波比較弱、尤其舊款嘅router。
鄭利明又表示，係一套標準嘅EMC（ElectromagneticCompatibility、電磁波相容性），規範產品電磁波唔會影響其他產品，同時抵抗外界干擾，但可能iPhone比較強：「所以喺同一WiFi地點，佢攞到線嘅能力比其他電腦強啲。」副教授建議可以試吓熄咗iPhone再開過，睇吓會唔會好啲，唔一定要換router。
電郵：mailto:[email protected]