此日收到葉劉淑儀議員電郵，應該係葉劉廣發親朋嘅標準函件，內容籲請支持匯賢智庫嘅南區區議會薄扶林選區議員候選人劉應東（EllisLau），左丁山並非該區選民，無資格投票。葉劉盛讚劉應東學識優良，今年廿六歲，年青有活力，有朝氣，在牛津讀數學與統計，再得牛津嘅數學碩士學位。薄扶林區之空缺，係由葉劉左右手陳岳鵬離任而騰空嘅，葉劉當然希望另一位匯賢才俊頂替。陳岳鵬今年約三十歲，史丹福大學碩士，得曾特首睇起，入特首辦做陳克勤議員以前個位，即特首辦政治助理。於「起錨起錨」期間，陳岳鵬跟住特首出席各種起錨活動，現在又負責特首之Facebook推廣工作，係一位砌得打得之人，點都算係經過區議會直選洗禮，對搞活動係有經驗啲嘅。
睇學歷，劉應東確係唔錯，點知第二日就睇到老友Chugani在《頭條日報》諷刺劉應東身為牛津畢業生，都唔敢上電視台出席佢嘅英文節目，係唔係怕講英文？褚簡寧在亞視英文台有一個時事節目，預備邀請薄扶林區議會候選人司馬文與劉應東一齊討論，點知劉應東唔肯制，因為唔想在電視台公開講英文喎！
香港人，牛津生，怕在電視台講英文？佢在牛津唔講英文？對手係司馬文，荷蘭人，講英文好叻咩？於是褚簡寧警告：「Useitorloseit」，代名詞it就係指英語。如褚簡寧所言，係劉應東唔上佢節目之真正理由，葉劉作為八十後才俊嘅師傅，或者要諗吓辦法糾正啲徒弟仔嘅怯場思維噃，出得嚟競選，駛乜怕醜呀，長毛梁國雄嘅英語會話程度曾受褚簡寧批評，唔會好得過牛津碩士啩？長毛咪成日接受外語記者訪問，大講英文！我地睇體育節目，見卡比路、文仙尼開記者招待會，面對英國傳媒照講不太合水準嘅英文，何曾會面紅吖。
在實際競選工程嚟講，英文冇乜作用，啲街坊選民邊會理候選人嘅英文程度吖，反而廣東話最緊要講得好，面對羣眾講廣東話好似曳過謝肅方十倍嘅話，點樣爭取選票呀。番書仔自外國回流就係怕佢地唔敢講英文之餘，連廣東話都講到一嚿嚿。