香港足球代表及港亞奧運代表隊開咗操近一個月，直至噚日喺掃桿埔球場嘅嗰課操練，都仲未齊人；除咗兩隊陣中公民、晨曦、四海流浪同埋天水圍飛馬嘅球員因隨球會出國集訓而缺席外，大中球員亦因晨操晚練為由請假缺操。可幸嘅係啱啱喺月中出國集訓回港嘅南華同傑志港腳，除前者嘅巢鵬飛外，已全數歸隊，令兩支代表隊終可照原定計劃，首次分開兩隊各自操練。雖然球員唔齊，但教練團又增多咗一個，加入南華助教陳志康後，教練團有成7個人，加埋「通天替補」羅繼華，都算陣容強大。
「陳七」同羅生唔夾口供
兩隊嘅主教練「招積」曾偉忠收操後就話︰「大中嘅球員冇到，有啲失去預算，因為我計劃咗啲練習做唔到；而陣中遲歸隊嘅傑志同南華球員，對我哋嘅練習模式係有啲生疏同陌生，但可以理解。」
至於同時係兩支代表嘅南華前鋒「陳七」陳肇麒（左），噚日首次隨港亞奧運隊操後就話︰「同之前嘅操練差唔多，今（噚）日晏晝都喺球會操咗課先過嚟，但相比之下，呢度感覺輕鬆啲。」咦？佢咁講，咪同足主羅傑承喺上禮拜球隊拜神儀式時話「驚港隊操練會操壞我啲球員」，好似有啲唔夾口供喎，但亦都證明佢依然咁「弗」。