台灣傳媒前日報道，香港財政司司長曾俊華月底會以港台經濟文化合作協進會榮譽主席身份訪台。協進會副主席李大壯噚日話，暫時未知行程，但希望盡快成行，相信會磋商經濟、商貿、旅遊等方面嘅合作。
鬍鬚曾暫時仲未正式公佈行程，不過佢噚日就喺網誌度封台灣國寶級現代舞大師林懷民做偶像，話今個月初先同太太睇咗雲門舞集來港演出嘅《花語》同《流浪者之歌》，仲話曾經同林老師傾過偈，對方話畀佢知，被稻米灑落頭頂嘅舞者一直保持合十嘅站姿殊不簡單，除咗雲門成員內心平衡非凡之外，舞者頭上原來戴有頭盔，以化妝掩飾，合十嘅雙手亦包紮住，減少損傷。