手信，是旅遊重要的構成，相信你不會反對，睇睇你家裏的戰利品就知了。相比到法國買路易威登、到意大利買飛甩雞毛，又或者到泰國買蝴蝶袋，我更喜買一些地道傳統手作，而且是直睹製作現場，見證一件手信的誕生，即使只係一個泥壺。
記者、攝影：曾冠輝
鳴謝：菲律賓旅遊局、佬沃海景假日酒店
$5百年工場泥器
陶器（或土器）應該是個全球通行的語言，甚至跨時代，若不何以世界各地都有不同形式的陶器，而且考古出土文物少不免有大量陶器碎？陶器正好反映了當地的飲食、宗教、文化、藝術，甚至連當地地質都一一記載了，何解？各地陶器都是就地取材的，陶器咩質地，即是土壤咩質地啦！問你仲敢唔敢睇小這個其貌不揚的陶壺！
「其貌不揚」是形容佬沃維干（Vigan）這家陶器工場的產品，如果在市集上遇上這個泥壺，十居其九你會直行直過連拎上手都費事。但當走入工場，親眼目擊泥壺如何由爛泥在轉盤上氹氹轉好似美少女戰士變身咁變成高佻有曲線的泥壺，即刻唔同講法。PagburnayanPottery睇落是個簡陋的工場，原來已世代相傳經營至第四代，是家百年老工場。工場的土器都是就地取材，用附近米田上的土壤來製造名為Burnay的土器，泥黃色的，表面粗糙拙樸，卻每個都手工製造，以粗壯的腳瓜推動轉台，以巧手造型，雖沒有《人鬼情未了》的浪漫，但勝在技巧純熟，兩三下手腳不用5分鐘便做好一個工整的泥壺雛型，然後便拿到工場後方一個長長的窯裏以千度高溫燒成土器。土器有不同款式，花瓶酒瓶都有。以為所製只有實用目的？工場主人MrGo立即拎出一個「土」製燈塔，人手雕花非常細緻，自鳴得意道：「我親手做的！靚呢~」
就在窯旁，我見到地上放滿一塊塊破爛的泥器碎片，以為是燒製過程中的次品，原來不然，碎片是故意製成的，用於放在海灘邊上，水漲時瓦片因有弧度而積水，潮退時水在烈日下被曬乾，剩下甚麼？鹽呀！原來碎片用來採鹽，確是聞所未聞！
PagburnayanPottery
地址︰GomezStreet,Brgy.VII,Vigan
$4手織布餐墊
陶器以外，織物確是同樣universal的產物，度度都有，只是當全世界都用巨型高效率的機器編織時，在人工舊式織布機下的工藝品就更加馨香。在抱威湖旁有一條小村落，未讀懂的名字叫Nagbacalan，這裏有家賣了將近廿年的布舖，若不是導遊帶路肯定唔識搵到嚟。尋常不過的小屋裏有位當地婦女在古式織布機前咔嚓咔嚓織織復織織，操作熟練的，在毛線縱橫交錯間織出條子或格仔，是當地特色的手織物AbelIloco，織得緊致綿密，因此布質耐用。係，市集都買到，但無得睇編織過程呢，唔知頭唔知路買咗返屋企你都唔會珍惜，因為你知道卻曾認真想到編織是個多麼刻板而悶人的過程。而且，這裏的布都比市面平一截，好似我睇中的紅白間餐墊，一塊唔使十蚊港紙，細張的才$4！抵過又靚過香港連鎖家品店的貨色，當下非要入貨不可，請朋友到家裏作客仲有古仔講吓㖭！
NagbacalanLoomweavers
地址︰22NagbacalanPaoay,IlocosNorte
$90設計味貝殼吊燈
回到佬沃市內，在AuroraPark同樣有地道手作手信。這公園有如城市內的綠洲，在四周交錯的馬路間橫空出現，沒有很高的綠化度，但幾個小檔攤足以生色。重新提醒你，佬沃靠海，少不了就「海」取材，最手到拿來的是貝殼，稍為加工、壓平，便可砌成純白而暗自閃耀的燈飾，有吊燈亦有座枱款式，富設計味；行過兩檔，有好些藤織貨色，手挽袋、枱墊等。這裏最難得是檔主都不會死纏爛打，啱傾就嗲兩句，看不上眼還是請你有空再來。這裏怎麼找？認住一個紀念昔日宗主國西班牙國王所立的一個紀念碑就得啦！
PhillippineCrafts
溫馨提示：在當地找可以港元兌換菲律賓披索的找換店非常困難，建議帶定美金以備不時。
TravelMemo
持BNO或特區護照可享7天免簽證入境。菲律賓領事館：28238500
由香港經馬尼拉轉飛佬沃，來回機票由$1,830起。萬福旅行社：23926666
1港元約兌5.8菲律賓披索（文中價錢已折算港元）
220V，兩扁腳插座
菲律賓
佬沃
下周有雷雨，25-31℃
