政府賣地，亞皆老街前民安隊訓練中心地皮賣出嘅呎價高達一萬零四百元，紅磡灣地皮呎價九千六百元，三年後建新樓落成，售價當在每呎一萬五千元以上。地產測量師T係梁振英師弟，入行二十幾年，拍賣前估計亞皆老街地皮一定會以四十億元以上成交，果然最後成交價係四十一億元，可見測量T眼光甚準，佢對左丁山講：「以後凡係市區住宅，售價一定在一萬元以上，叫做豪宅嘅都會賣一萬五千至二萬蚊一呎。嗱，有人話要起多啲細單位，如果真係咁，五百呎市區樓要七百五十萬至八百萬元噃，你肯唔肯買呀？」新結婚兩口子有咁多錢嘅話，不如去新界買過千呎單位啦！
無錯吖，在西九凱旋門買個五百呎單位，邊個負擔得起？只可能係在ibank工作之單身貴族，普通打工仔唔駛諗。中區如果有五至七百呎單位，隨時要呎價兩萬元，但除咗市建局重建之外，中環去邊度搵住宅地皮？月前，老闆C請一班老友吃午飯，席設九如坊大班樓，左丁山住得背，唔知大班樓響邊，卒之要問人，去鴨巴甸街「蓮香」旁邊行上去，呢間大班樓嘅價錢都幾貴，據講晚上有不少名人來此。左丁山注意到呢度有好多舊樓，如果拆咗起新樓，中區就有地盤嘞，但測量T話：「你唔知嘅嘞，有唔少隱形收租富豪係九如坊一帶嘅業主，而且業權分散，想收樓，冇咁易，隨時搞足十年八年，而且落成之後，可以話俾你聽，二萬五千蚊一呎！賭唔賭番一餐大班樓晚飯？」咪搞我，左丁山識搵錢之後，已搬往新界，現在及以後更冇資格住在市區。
長此以往，樓價因為利率超低，易升難跌，社會怨氣必然增加。有一項絕招，相信政府必定不敢推行，就係港元與美元脫鈎，放棄聯繫匯率，等香港可按本身需要，調整利率。印度、澳洲、紐西蘭都驚住經濟過熱，調升咗利率。港元如果脫鈎嘅話，就可以加息抑壓樓價及阻止資產市場泡泡重現。現時環境下，冇股票冇樓在手嘅市民，怨氣沖天，有樓有股票之人就咭咭笑，仇富氣氛由此而生。目前美元弱，人民幣強，中國經濟成為世界第二大，係港元脫鈎最佳時機。