永遠要同時代一齊進步嘅阿姐汪明荃，噚日同老公羅家英現身屯門，為下月喺沙田大會堂再度重演嘅粵劇《德齡與慈禧》宣傳。咁蹺噚日係阿姐農曆生日，家英哥出盡搞笑技能冧老婆開心，首先就話阿姐個造型叫「差利卓別Lisa」，當fans送壽桃時又話阿姐壽頭壽腦，一定比六叔長命，又應記者要求獻吻。
「很像被人監視」
家英哥仲送咗部價值七千幾蚊嘅歐洲版iPad畀老婆做生日禮物，活動後雖然要趕飛機去西安拍戲，都不忘幫阿姐影相放上微博，鬼咁識做。
家英哥仲爆前日喺上海有個瘋狂fans不停影阿姐相，仲起晒底話係一個柬埔寨嘅fans，專登飛到上海睇騷，雖然個fans只係狂影相冇其他更激舉動，但就纏住阿姐影相，搞到阿姐好唔耐煩，所以家英哥忍唔住喺微博呻咗幾句，話：「有一位粉絲，同機返港，他的行為有些商榷，拿着相機不停的拍照或錄影，使太太很煩躁，很像一直被人監視，很不舒服，想小睡一下也不敢，熱情過度是不好的，請大家斟酌斟酌。」
送阿姐iPad賀壽
對家英哥送嘅貼心科技生日禮物，阿姐就非常鍾意，但就俾家英哥踢爆話佢要四圍問人部iPad點玩。阿姐話遲啲西曆生日先再同家英哥慶祝。講到政府花咗一億五千萬買入西九文化區三個設計，阿姐就撐話花咁多錢買國際級設計係必要，仲話最重要係市民去睇完再畀意見，佢都會抽時間去睇喎！