《○八憲章》首批簽署人之一嘅劉賢斌，今年6月28日被四川省遂寧市警方以涉嫌煽動顛覆國家政權罪刑事拘留，上月6日被正式逮捕，案件最近移交法院。全國各地紛紛發起「我是劉賢斌」關注團行動，香港嘅亦喺上月30日成立，噚日佢哋喺銅鑼灣收集簽名，近400個市民聯署，聲援劉賢斌，支持《○八憲章》。
「我是劉賢斌」香港關注團計劃，呢個星期五（8月27日，即係劉賢斌被捕滿兩個月嘅前夕），上午11點喺西區警署集合，然後遊行往中聯辦，要求釋放劉賢斌。劉賢斌因參與民運同呼籲關注維權人士，屢被中國政府無理拘禁，91年因參與八九民運被控反革命宣傳煽動罪判刑兩年；99年因籌組中國民主黨四川籌備委員會，以顛覆國家政權罪被判刑，08年底獲釋。