有個老死，架車部冷氣明明有聲兼唔夠凍，偏偏懶懶閒話暑假已尾聲，好快開始凉，自己又唔怕熱，索性遲啲先整。更話車底無滴「倒汗水」，冷氣正常過新車。聽落好似有道理，但大昌行Lawrence卻話：「全部Concept錯晒！」
記者：徐影龍
攝影：林栢鈞
Model：Kinki@PureModels
鳴謝：大昌行
雪種過多 車頭唔散熱
我自己都係怕凍多過怕熱，坐住朋友冷氣出問題的車，本來都無乜所謂，反正開窗迎風仲有Feel，點知大昌行Lawrence話冷氣都唔可以忽視：「冷氣機出問題不外乎幾個成因，雪種過多或過少係常見一類，過多嘅話最危險，會令壓力升高而Cut停散熱，從而令車頭出現過熱情況，唔知情者繼續行大長途，分分鐘死車收場，有幾危險可想而知！」原來冷氣咁緊要，而且香港地熱得異常，去到12月仲可以着短袖衫出街，都係勸老死及早搞番妥個冷氣先得。
DIY簡單自救
除了多啲留意愛驅冷氣情況，其實冷氣機出現輕微症狀時，例如風力唔夠、皮帶出現吱吱聲等，只需幾個簡單步驟，車主都可DIY自行搞掂，大病當然要睇醫生啦！
洗網
最重要亦係最多人忽略一環，就係清洗散熱網。同家中冷氣機一樣，散熱網靠行車時入風達到散熱作用，故最易積塵，車主大可打開頭冚，以水喉噴射鬼面罩後方的散熱位，水力越猛越好，只需小心不要噴到引擎附近的電子零件就得。
噴潤滑油停尖叫
撻車時聽到車頭發出「吱吱」高音尖叫聲，好大機會是皮帶出問題，先試噴WD-40，滋潤一下位於引擎附近稍低的皮帶位。若問題持續，好大機會屬皮帶老化，就要找車房更換。
瀨尿屬正常
停車後遺下一灘水，原來屬正常過正常，證明冷氣夠凍令空氣內的水分子凝固到。相反停車成粒鐘，只得幾滴貨仔，就要Check吓車喇！
