做咗兩個月「獨立議員」嘅鄭家富，噚日喺港台訪問再提2012年唔選立法會嘅事，咁啱《明報》話阿富做證婚好好搵，今年10月10號世紀好日一日做足30場，至少袋10幾萬，唔通佢為咗搵真銀而放棄公職？
最想搞中產法援
八方聽聞，唔少準新娘都睇中阿富口齒伶俐、識搞氣氛嘅優點，有啲人仲喺討論區話信得過佢係立法會議員，唔會臨時甩底咁話。阿富就同八方講，絕對唔係因為搵銀而退下火線，講到尾都係功能界別呢個「深層次矛盾」令佢覺得留低都冇乜意思，「一年有幾多個10月10號吖，啲租咁貴，好微利，如果我真係想做呢樣（證婚）呀，繼續做議員咪仲好，可以keep住個知名度，一唔做，啲人好快唔記得你。」
數吓手指，到2012年阿富就做咗18年立法會，佢話自己雖然唔係最老，但都冇乜新思維，上屆已經唔想選，下屆唔參選嘅意欲都好強。
唔做立法會之後，佢最想搞中產法援，好多中產因為有百零二百萬資產，攞唔到法援，唔敢打官司，如果可以好似外國咁，搵到商界協助，成立民間法援基金，就可以幫番啲中產咁話。