溽暑8月，陽光猛得刺眼。走進大埔運頭塘邨街市，靜悄悄的，莫偉生的小店在街市一角，他赤着腳在店內外走出走入。有個少女說家人剛出院回家，媽媽叫她來買些「檻火盆」的冥鏹。莫偉生拿了一叠溪錢衣紙，還問她要不要火柴，少女點點頭，付上兩元。
莫偉生在運頭塘邨街市經營賣香燭的小店，不是所有顧客也要他動手，有些主婦會逕自入店內自助式選購，取齊拜天神、土地的衣紙，才叫莫偉生算價錢。「我93年8月入嚟，嗰時開咗邨11個月，初時啲人叫呢度暈陀陀邨。」十多年來，邨民祭祖先、敬鬼神，多數來此買香燭冥鏹，「94、95年最好生意，全條邨入晒伙，最多人住」。
做街坊生意年中無休
莫偉生做的是祖傳生意，祖父在香港經營線香買賣，爸爸繼承父業，註冊了雄記香庄做招牌，「我73年偷渡嚟香港，初時做三行，老竇84年過身，先返嚟舖頭」。雄記當年在慈雲山徙置區開店，「房屋署拆樓，叫我搬入嚟做，嗰時投呢個舖位，月租9,700蚊」。他一邊說，一邊拿起幾包線香，塑膠包裝袋上還印着老店地址：九龍慈雲山四十三座六十七號地下；電話號碼只有七個數目字。「呢啲香都係香港製造，洪水橋有個工場幫我做，係真正檀香。」莫偉生住在沙田公屋，每天5時半起床，飲早茶後8時回到大埔開舖，晚上7時才落閘，「十年如一日，一年只係農曆年放幾日假返鄉下」。他說做街坊生意困身，年中無休，「落嚟買對蠟燭，見你冇開門就去第二間買，下次就唔再幫襯」。
這些日出而作，日入而息的日子，過多一個月，可能要變了。領匯9月底收回街市，改租予大型超市，街市大部份商戶不是搬遷就是已結業，莫偉生與其他幾間街坊小店留守至今，他說領匯建議他搬到其他屋邨，「每條邨最少有兩間香燭紙紮舖，人哋都係做街坊生意，我搬到去都冇生意做。呢條邨啲人，又唔會搭車去幫襯我，你叫我點做？」
結業最捨不得老主顧
有些街坊知道街市要變天了，近日來買農曆七月燒街衣的紙祭品時，問他有何打算，莫偉生總是說見步行步，或者看看有沒有機會搬到食環署街市繼續做生意。他說有心理準備結業，祖業一脈香火，傳到他這一代要消失也無可奈何。最捨不得的倒不是線香上的老招牌，而是年月相對的老主顧，「我老竇66歲過身，我今年都64歲，仲有幾年，都做唔埋落去……」
記者 羅偉光
