貴為換肝手術國際權威嘅香港大學外科部肝膽胰/肝臟移植講座教授盧寵茂，前日完成本港首次同步換心臟肝臟嘅19小時馬拉松手術之後，唔知係咪因為平日返醫院做嘢慣咗直踩十幾廿個鐘，開完記者會竟然去行夜山，為11月嘅毅行者做準備，噚日又去巡房，體力驚人，堪稱「鐵醫」。
八方噚日打畀盧寵茂恭喜佢完成創舉，盧教授把聲聽起嚟好攰，原來佢前一晚去咗麥理浩徑行山行到凌晨四點幾，之後瞓咗一陣，又返去瑪麗醫院，睇吓嗰位換咗心肝嘅女病人康復成點，仲話做醫生冇得五天工作，星期日都要返去睇住啲病人。
報名參加樂施毅行者
既然咁攰做乜仲要行山？盧教授話冇辦法，因為佢報咗名參加今年11月嘅樂施毅行者，要做足準備，但係日頭怕太熱，驚30幾度高溫下行到中暑，所以寧願捱眼瞓行夜山。今年樂施毅行者參加人數有成4,600人，破晒歷年紀錄，八方問佢咁勤力練習係咪想攞冠軍，佢聽完笑咗笑，話行得完成段路已經相當好。
今次盧寵茂同班同事完成同步換心肝手術，係香港醫學界一大突破，盧教授仲形容，今次手術可以話係佢醫學生涯之中難度最高嘅一次，唔係難在手術技巧，而係要心臟同肝臟外科、麻醉科、手術室護士等等，成70個醫護人員合作，大家要好好配合並唔容易。
唔肯透露將有乜創舉
至於今次手術成功係咪佢最大嘅成就，盧寵茂就強調，佢一生人最大嘅成就係幫到病人，好似舊年佢班同事撮合兩個肝衰竭病人嘅家庭「交叉換肝」咁，同樣都係難度好高，其中一個捐贈者更出現併發症，要再開肚做手術，對盧寵茂嚟講，都係佢做醫生以嚟嘅一次好特別嘅經驗。
問盧教授下次想再做啲乜嘢醫學創舉？佢笑笑口話係「秘密」。又話自己今次都想個病人穩定啲先出嚟公佈，但係見傳媒咁有興趣，惟有周末都開記者會同大家分享喜訊。
mailto:[email protected]