唔買DVD、要等Blu-ray！Sammi、Eason係咁，連學友《MiniConcert》亦不例外，24bit/96kHz版Jazz靚音色如何？視乎器材級數，但講Feeling，感覺極良好！如果你睇緊60"巨幕，直頭以為學友喺你面前獨唱，PrivateCorner絕非虛名。
記者：陳國輝
色士風提琴逐一聽
首次睇《MiniConcert》，可能會問：「點解得100分鐘咁少？」咁諗好正常，但一般紅館演唱會請嘉賓、做表演、落埋台握手，嘥時間似睇Show；學友今次以歌會友，地點係只坐幾百人嘅迷你音樂廳，佢一直坐定定唱Jazz，就個人認為，若靜坐180分鐘齋唱，睇怕會悶親一班香港Fans，相反，全場僅唱15首歌曲，感覺啱啱好。
要欣賞嘅除咗學友把聲，當然唔少得聽Jazz。老實講，筆者了解唔多，但開住dts-HDMA5.1嚟播，最突出還有那些管弦樂音效，小號、大提琴，甚至連Bass結他，樣樣有定位搵到晒出嚟，最特別係木管樂器奏出嗰種海浪聲，超正！
紅藍綠色調猛咁轉
畫面又點？1080p全高清，預咗Details做得好細緻，但呢隻碟始終係LiveShow，製作上難免會先顧及現場效果，例如燈光方面，經常紅、藍、綠，不停轉，色溫猛咁變，特別當燈光打到臉上嗰陣，仲有機會發生過份曝光情況，但唔算嚴重；反值得一讚係黑位表現好掂，無Noise，更難得黑麻麻背景下，就連各表演者身上所穿嘅黑西裝，都能清楚睇到，層次感極豐富。
Bonus無乜特別，例牌訪問吓音樂總監，亦播放一段學友練歌情況，相信只有Fans會感興趣。除咗一隻Blu-ray碟，其實包裝內再送一隻BonusDVD，入面包括《迷你》等3首新歌MV。
