每個星期都有幾日在皇后大道中碰到梁智鴻醫生，佢泊低架車喺停車場就行去醫務所或私人辦公室，今年七十一歲咯喎，仲咁鬼精神嘅？問佢有何秘方，食乜嘢補藥，梁醫生話：「我係西醫噃，食乜補藥呀，乜都唔食，正常食飯就算啦。」咁有乜運動呢？梁醫生話：「冇噃，冇時間做運動。」係嘅，佢身兼港大校務委員會主席、行政會議成員、安老事務委員會主席，在中建大廈開醫務所，晚晚到養和醫院做手術或巡房，好難搵到時間做運動。但點解咁fit，聲若洪鐘呢？梁醫生話：「大概我日日行得多之故。朝早擺低架車之後，我就係在中環行路，去筲箕灣、荃灣等地區就搭地鐵，搭地鐵要上上落落，行好多路o架。」
咁fit嘅長者，久唔久去巡安老院，與陳伯、黃伯、黃婆婆等等老人家傾偈，了解民情，佢話啲老人家認為住安老院幾唔錯，但如果能夠住在屋企日夕與兒孫見面就仲好，點解唔住在屋企呢？家家有本難念的經，譬如兒媳一齊返咗工，孫兒返學，一個人在家，邊個照顧呀？未必請得起菲傭噃。日日由兒媳送去安老中心過日辰又如何？老人家話俾安老事務委員會主席聽：「安老中心每日開九點，閂四點半，兒媳冇法子接送我呀！」主席唯有嘆息一聲，安老中心點解唔可以上午七點半開門，晚上七時半關門呢？如果係咁，兒媳、兒女就可以在返工前、放工後接送阿爸阿媽啦。
改安老中心工作時間，聽起嚟似乎容易，要做就唔係講心，而係講金，僱員每日開工多五個小時，OT點計，如果依足政府程序辦事，就要請多啲人，分班返工。喂，資源呢，預算呢，真係講錢失感情，梁主席暫時都冇符。
香港雖然空氣污染、噪音不絕，但人均壽命長，在世界上數一數二，其中必有原因，不過未有人做過科學研究啫，正因港人長命，六十歲還是盛年，六十歲退休似乎浪費經驗，梁主席就呼籲各大企業唔駛硬性規定六十歲退休，可以推行彈性退休年齡，但啲等上位嘅五十五歲後生可能有怨言話上司阻住地球轉噃，講吓先啦，或者梁主席講得多，就有人聽佢支笛。