PS3體感遊戲Move下月15日在港全球首賣，生產商SonyComputerEntertainmentHongKong想壯大聲勢，計劃喺新學年免費送遊戲機畀小學，試行虛擬體育堂喎。SCEH巿場部經理Jacqueline話，家喺沙田新城巿廣場設置攤位試玩Move，發現唔少家長同小朋友對體感運動遊戲好有興趣，公司咪決定將Move殺入校園囉，「接觸唔少學校都話有興趣」。
激發對運動興趣
Jacqueline又講，PSMove有四款運動遊戲碟，種類包括高爾夫球、沙灘排球、射箭、保齡等，「受到場地限制，小學好難提供高爾夫球等運動，Move就幫到小學生接觸呢啲運動，激發佢哋對運動嘅興趣」。小妹噚日喺PS3攤位走咗轉，又真係有唔少家長帶埋小朋友嚟玩，有星又有官。好似財政司司長辦公室政治助理葉根銓帶住囡囡行過。佢囡囡望到眼定定，同小妹講贊成學校有得玩體感遊戲喎。
TVB劇集《天天天晴》飾演OL嘅Kitty近排喺劇中捲入三角戀，受到唔少宅男歡迎。佢都帶埋升讀小二嘅老友仔Marcus到場玩。佢哋兩個又跳又撲玩沙排；跟住全神貫注拉弓玩射箭；再揸桿打golf，打得似模似樣。Kitty話，估唔到啲體感遊戲像真度咁高，玩到索晒氣。Jacqueline話，喺沙田嘅試玩攤位做埋今日，9月會移師尖沙嘴海港城。
電郵：mailto:[email protected]