大同機械（118）嚟緊星期二（24日）派半年度成績單，集團雖則冇發盈喜，但博佢盈喜股炒。大同09年上半年度（6月底止）繼續受金融海嘯拖累，所以見紅1814.7萬銀。但隨住經濟復蘇，全年度已經有微利730萬銀。
照計，大同食住復蘇勢頭，注塑機等等核心業務，可以支持番業績增長，而即將派發嘅中期成績單，亦已經可以炒虧轉盈。
再講，大同聯營嘅浩寧達今年頭深圳上市，大同因而獲得一次性收益2億銀，連埋呢項收益墊底，大同業績坐定粒六。又大同NAV每股1.4元，現價（0.76元）折讓高達46%，亦係平過同類股震雄（057，折讓24.7%）一截。呢期市場狂炒落後股，大同一樣有Point炒。呢轉博大同折讓同震雄睇齊，現價要升32%到1蚊樓上。
力寶大折讓上望$3.59
力寶（226）係真真正正盈喜股，即係話嚟緊30號公佈嘅半年度業績，會好靚仔已經唔成問題。又力寶最新NAV每股9.4元，而集團透過附屬，揸住唔少亞洲區優質物業，未計任何物業重秤，現價（2.86元）折讓達69%，呢家控股旗艦嘅折讓，仲係大得有啲離譜。繼續博力寶NAV收窄，上望1年高位3.59元，現價升幅25%，力寶折讓仍高達62%。
錢雋