"沙馬克個名夠生猛？"
畸寶搶回英超播映權，對家高層笑稱冇咗仲好，睇業績睇股價又似乎啱噃；畸寶上半年業績蝕億五，仲話下半季唔樂觀，股價自世盃後跌咗兩成。相反8號仔近3個月升咗近3成，表面睇，似乎同英超係一次好心分手。
點都好，我哋作為顧客就慘，俾佢哋玩到氹氹轉，好似球員譯名點解唔跟馬會方便全港球迷？舉例阿仙奴前鋒，近年通用查馬克，硬要自己攞番嚟播就譯沙馬克，唔通貪個名夠「生猛」旺吓個台？所以咪連評述嗰場波嘅堅哥，都一時改唔到口囉！
"買波膽始終最過癮"
成個禮拜除咗周一仍然係下盤天下，不過對於喜歡奉行以小博大為原則，攻波膽嘅球迷，其實「上定下」影響唔會太大，我都好少可以一晚內能串射到兩個正路「其他」波膽。
冇裝畸寶，去咗會W同M等好友，佢哋一路唱K，我就齋望住另一部電視，見車仔係咁入波；打完車仔又到燕豪芬入6粒，雙眼兩耳有唔同享受！
"鯨魚真正王者？"
日聯係好多波友、包括我在內，英超以外嘅至愛；無他嘅，時間好，水準又比澳職好，唔賭都值得欣賞。冇馬後炮，跟開我貼士嘅都知早在上半年，已點名捧大事擴軍嘅半熱門鯨魚在今屆聯賽封王。
好友T好鍾意買「冠軍」，幾個月前6倍又買啲，9倍又買啲。周中前隊波去到奪標大熱，點知直播戰又患恐強症，先輸1粒，跟住狂攻前鋒，眼看扳平有望……，最後輸多3粒。
唉！班波太重鬥莉王，中路防守易被對手突擊扯開，捧佢哋冠軍我未動搖，但逐場賭要睇吓對乜嘢對手，恰魚腩放心攻大波膽好過！
"英超要睇也要有耐性"
不滿畸寶嘅聲音不絕，原來名專欄作家左丁山都有切膚之痛，話要cut晒佢再淨申請睇足球，等佢哋個APRU（AverageRevenuePerUser），即每用戶平均收入下降；我仲係自由身，想我落叠，都唔會喺呢段時間同人迫，有緣，總會再走在一起！
"天鵝射英超3下盤"
上周重心愛華頓上盤失手，今周都係一心一意追下盤，但今天早場日聯捧吓天鵝先，極勇對作客多跌watt嘅前鋒，平手可博；英超三下盤推介，作客受讓嘅布力般同新特蘭冇乜好評，求賭啫。
不過，史篤城主場特勁，受讓名牌到暈、兼周中作客在瑞士激戰喪師嘅熱刺，相當着數；尤其確認破紀錄轉會費來投嘅堅韋尼鍾斯傷癒可踢，更可盡情施展手榴彈同死球威力，今晚將是連續第12天上班，路仍遙遙，喺公司一路做嘢，一路捧下盤兼冷W先。
文：蘋果波神
語錄：唔好以為攞咗個王牌節目，就可以冷待客仔；店大先可以欺客，但睇波唔似為食好嘢要受氣，唔幫襯你，唔代表大家睇唔到喎！