粉粉美女閨房樂　KawaiiTV

林峯套《摘星之旅》網上熱播，相信唔少潮追玩家，喺網上連大結局都已經追埋！夜晚無記「翻做」唔想同屋企人翻輪多次？最好當然係喺房內入隻私伙電視喇，最近LG推出一款Kawaii風格嘅TVLE6500，粉紅色機身加上底座，26吋同22吋，細細隻放喺女仔房襯晒！

記者：許福合
攝影：陳盛臣
Model：KinKi@PureModels

白裏透紅

大部份電視，外形都係講派頭、講型格，不過睇落咪又係千篇一律，黑色一塊嘢囉！LG這款KawaiiTV特別之處，就係玩超可愛Look，當機身喺燈光下，會見到表面塗層白裏透紅，當反轉機背更有圖紋暗花，那39.9mm厚度，望落相當薄，放入房完全入型入格，當然，若配埋女仔房嘅裝飾擺設，就更加可愛到震喇。LE6500可以接收傳統模擬訊號同高清電視，同時又可接駁電腦，另外仲有HDMI及色差輸入，要玩PS3或Wii都無問題。

■機底有兩個5W喇叭。

■機背、機側共3組HDMI。

■機背仲見到圖紋暗花，極具心思。

■透明紅色底座好夢幻。

LED靚色

LE6500有26同22吋兩款型號，並使用LED背光技術，煲劇時最正係可以使用24p影院模式，打開之後會發覺無論係光暗度、飽和度及對比度，視覺效果都會有接近戲院嘅24格效果。另外，睇波或打機時，都有相應嘅AVMode可以選擇。
聲效方面，雖然無玩5.1，不過就用咗個ClearVoiceII技術，可以用來控制人聲水平，例如可令到電影內對白更清楚，房仔睇戲最啱！機背其實仲有USB插頭，可支援USB儲存裝置，並播放包括HDDivX影片、音樂，數碼相片亦可經讀卡器立即睇番，唔使下下靠電腦咁麻煩。