呢輪啲姊妹都吼實宜家幾時推出2011年產品目錄，好在小妹同宜家巿場經理郭秀慧Maria都幾friend，佢唔止率先畀本新目錄小妹，噚日仲帶小妹巡吓有乜筍盤添。Maria笑笑口話：「新目錄大約下星期六喺分店派發，但係新貨已經陸續有得賣。」
小妹揭吓本目錄，有成1,200件創新低價產品，有啲餐枱定價比舊年平七成，咁筍？Maria話，宜家不斷將貨品嘅運輸、包裝成本減省，慳咗嘅錢就用嚟壓低定價，「好似將梳化設計到可以拆開運輸，或者唔用包裝箱，慳埋慳埋定價咪平啲」。
Maria特別推介佢哋一直熱賣嘅反通脹Lack枱，由10幾年前賣$321，經年壓縮成本後，舊年賣$99.9，今年再減40%賣$59.9創歷史新低。另一筍盤Klippan兩座位梳化，舊年賣$1,590，今年減13%賣$1390；Aspelund雙人床架減價三成賣$990，「Aspelund同一系列嘅睡房傢俬，包括床架、床褥、衣櫃、兩層櫃桶、床頭櫃同櫈，成套都係賣$4,866.9。夠平未？」
推記憶泡膠梳化床
全新款式嘅貨品有2,000款，定價比巿面同類產品平一、兩成。Maria話，好似主打之一嘅Kivik梳化系列，座墊用上記憶泡膠，三人梳化床連扶手貯物箱，都係賣$7,790（用上記憶泡膠嘅梳化床一般都要賣成萬蚊）。另一款Stuva五顏六色兒童貯物組合，衣櫃連三個櫃賣$1,730。
電郵：mailto:[email protected]