拉姑一早到場打點
馮仁昭四圍超：栢芝、霆鋒細仔擺百日宴 - 馮仁昭

張栢芝今年6月為謝霆鋒再追多個囝囝Quintus，唔經唔覺前日已經係100日。噚晚栢芝同霆鋒兩公婆喺灣仔福臨門幫Quintus擺百日宴，大批記者聞風而至，場面相當墟冚。
噚晚7點幾，嫲嫲狄波拉（拉姑）已經帶埋Lucas同Quintus兩個乖孫到場，同各位親朋戚友影相。至於謝婷婷都一早到場幫手打點。到場嘉賓包括李琳琳同姜大偉夫婦、陳淑芬同個仔陳家豪等，家豪仲即時將乳豬同白灼蝦餸菜相放上微博。

拒回應曾戀安仔

另外，栢芝同老公謝霆鋒前晚出席栢芝細佬喺銅鑼灣投資嘅酒吧開張活動，最近忙湊仔嘅栢芝話有電影同廣告工作洽談中，佢又話一定會再生小朋友。講到細仔Quintus出世100日，栢芝前晚話之前都有食飯慶祝，佢話：「因為聽日老公要做嘢，所以先同屋企人食飯。」
有傳栢芝曾同許志安拍拖，栢芝回應話：「我要睇咗報道先再回應。」後來佢捧出蛋糕為好友周麗淇預祝生日。