室內禁煙條例實施後，好多煙民上街「打邊爐」。控煙辦主管林文健早前放風，話要擴大禁煙力度，包括將建築物出入口五米範圍列作禁煙區。連打邊爐都趕盡殺絕？「好煙民大聯盟」上星期去信要求林文健親自出席論壇交代，點知佢只係搵個o靚回覆咗一堆官話，又唔肯出席，激死聯盟，家要升級搵佢老頂衞生署署長林秉恩回應。
李默facebook發功
喺facebook寫明「不為『五米』而折腰！向恐（控）煙辦說不」嘅大聯盟盟主李默，一講起林文健就把幾火：「好唔高興，但冇得表達，唔通要去馬路上食？」
控煙辦回覆話現階段冇計劃落實五米內禁煙、全部煙包一隻色以及場所負責人要負刑責，但表明呢啲措施可以更有效防止他人吸到二手煙同限制煙草促銷。最抵死係回信仲提供埋衞生署嘅戒煙熱線：1833183。衞生署發言人就話已覆咗大聯盟話毋須出席論壇。
李默話唔會就咁算數，近日佢喺facebook展開攻勢，揶揄控煙辦係恐煙辦、空煙辦、兇煙辦，「以空/兇我等為己任，何等幸運的職位，收厚薪、頂戴光環，好high咁盡其所長去空/兇平民」。