林一峰和林二汶走在一起時，為了小事如到哪裏吃晚飯都可以拗一餐，不過兩兄妹自然有默契，工作時你一言我一語互窒一下便度到橋。兩人一起時所產生的詼諧作用，連伊館也主動邀請他們在該場地開騷，務求令fans有靚歌聽又可笑餐飽。
繼去年在紅館開演唱會，稍後林一峰和林二汶將在伊館舉行演唱會。二人閒來最愛吹水，笑笑罵罵已把歌曲排序安排好。他們日前接受訪問，透露演唱會上其中一首歌《愛你枕邊暖》是向師奶致敬，跟着二人嬉笑一番，便構思到下一首歌以各行各業做主題。
林一峰說：「我哋講音樂只會係2%，但95%以上講無聊嘢，不過講講吓可能成真。演唱會rundown，係我哋玩吓吹吓，半個鐘度晒！」
伊館垂青
是家人又是拍檔，一峰和二汶覺得彼此是最好的知己拍檔，一峰謂：「唔使溝通，有時唔使講出口。」二汶則說：「大家好有默契，佢趷起條尾我就知佢屙屎定屙尿。」間中二汶會戲弄哥哥，一峰說：「佢好鍾意訓練我EQ，三分鐘前去換衫，佢叫我畀錢佢整容，話整細個胸。」二汶笑說：「樂趣就係佢估我唔到，最想睇佢反應。」
去年合作開騷反應佳，今次演唱會更是伊館主動要求他們在該場開騷，一峰開心地說：「可能佢哋發現我哋夠合家歡，有詼諧作用，真係好開心。」
採訪：王連連 攝影：葉君海
場地：CucinaMarcoPoloHongKongHotel