前晚花旗股市先跌後反彈，幾個主要指數收市都微升，但技術上仍然受制於阻力位，花旗股市要炒上有難度，暫時仲未擺脫區域上落嘅格局。
亞洲股市噚日全面上升，但係幅度唔算大，港股好反覆，恒指最後升49點，大戶繼續舞高弄低喺即市搵食，港股短線個勢偏軟，回試100日線機會仍然幾大，短炒要保守啲，唔好太博。
中鐵C輪23540：中鐵（390）噚日報收5.86元，升3.5%。股價之前下試過5.50元，跟住就掉頭炒上，上升步伐唔算快，但噚日以大成交推向250日線，如果成功突破，有機會推向6.60元，可以諗吓隻C輪23540。
隻輪現價48仙，2011年2月25日到期，行使價6.88元，溢價25.6%，引伸波幅48.7%，槓桿率12.2倍（有效4.8倍），正股見6.60元，23540睇82仙，正股跌穿5.60元就沽咗隻輪。
俊樺