出道時被形容為翻版王菲的女歌手黃馨，沉寂多時，最近再次活躍樂壇，自資推出唱片《犬之歌》，她已是畫廊老闆，不知是否做老闆做上癮，免得新碟限制多多，一於自設唱片公司，實行自己話事，不再受制於人。
黃馨以前因與唱片公司意見不合，提前解約不歡而散，今次出碟為免發生同樣事件，而且她希望做一張完全合乎自己心意的唱片，索性做埋老闆開唱片公司，自己話事。
「戶口剩30蚊」
黃馨想做歌手的路並不好行，當年被解約後，曾過着非常潦倒的生活：「我個人除咗慢熱，連個腦都轉得好慢，當時銀行打畀我，話我戶口剩番30蚊，唔夠錢扣數，嗰時我仲未識驚，只係想買杯咖啡飲吓，去到Starbucks叫咗杯咖啡，收錢時話要30蚊，我先諗起冇錢，走都走唔切，後來匿埋屋企兩日，乜嘢都冇做，先開始識驚，又唔想搵屋企人幫手，之後不停打畀朋友，問有冇freelance畀我做。」
黃馨又表示試過在港見工，每次被人認出是歌手，總覺得她不會認真工作，她說：「最好笑係見完工，佢唔請我，但仲要同我影合照，想點先。」
花五年翻身
幸好在最失意時黃馨被一間畫廊老闆聘用，還肯預支人工，之後花了5年，儲夠錢便開設屬於自己的畫廊，她說：「以前傳媒可能覺得我好難溝通，其實我真係太慢熱，家開咗畫廊之後，好多事都要親力親為，開始識得溝通之道。」
採訪：胡比 攝影：陳慧安
