陳自瑤（YoYo）最近在無綫劇集《女人最痛》破格飾演狐狸精，不但比堅尼晒事業線出鏡，更姣黐有婦之夫林嘉華，角色乞人憎，不過YoYo強調螢幕外絕不會做第三者，絕不容狐狸精介入她與男友王浩信的戀情，YoYo指捍衞之責要靠男友定力。
近日每晚打開電視都見到陳自瑤出鏡，她一劇接一劇，雖然佔戲不多，但每個角色都讓YoYo有發揮機會，令她密集式特訓磨練演技。
論較為突出是今晚播映大結局的無綫劇集《女人最痛》，她在劇中扮演狐狸精Stephy，姣媾林嘉華，並介入他與米雪的婚姻，最終米雪成功踢走第三者。
靠男友自制力
首次扮演狐狸精的YoYo，演得入木三分，劇中還破例比堅尼出鏡，大騷啪骨後升cup至32B的咪咪。
YoYo現實生活中與男友王浩信感情穩定，問到她可有防狐狸精方法提供益姊妹？YoYo認真的說：「冇o架，狐狸精嘅嘢，好講男仔嗰方面，真係防不勝防，而且就算我好防，都係冇用，呢啲嘢好睇男仔本身嘅自制能力。」她表示投王浩信信任票，她語氣堅定的說：「同得一齊就梗係信任。」
YoYo指鏡頭外除討厭狐狸精外，也抗拒做貪錢情婦，她說：「拍劇演吓呢啲角色冇所謂，但現實生活就咪搞，明知同對方冇結果我一定會彈開，我又唔係鍾意人哋啲錢，我需要嘅生活好簡單，唔使好物質，我最怕嗰啲又肥又矮又猥褻嘅男仔，多多錢都愛唔到佢哋，真係多謝晒，呢個唔係我杯茶。」
專挑斯文靚仔
當記者取笑YoYo過往的緋聞男友蔡淇俊、現任男友王浩信都屬斯文型，看來她擇偶專挑靚仔，此語如點中YoYo死穴，她隨即笑到收唔到掣，YoYo邊笑邊說：「我揀男朋友要對方正經同專一，呢啲係好男仔應有條件。」
YoYo直言自己算幸福，波折不多，她說：「個天算待我不薄，我啲經歷都冇乜嘢大起大跌，又冇試過好慘情嘅事，屋企人同朋友都好錫我，我好知足o架啦。」
採訪：比華利
攝影：仇志中