台灣組合飛輪海成員汪東城（大東）拍劇時經常同女主角傳緋聞，王心凌、楊丞琳同許瑋甯等都無一倖免，原來大東平日愛蒲夜店辣妹，早前佢就連番被影到夜會唔同辣妹，仲跟靚女返屋企短敍。
據台灣傳媒報道，大東上星期六晚喺台北華視影廠做完嘢，返屋企換過衫，由朋友接載到信義威秀影城附近，會合台灣藝人唐禹哲一齊去SPARK夜店，其間一個短髮辣妹忽然出現，同大東有傾有講好投契，一行人喺夜店玩咗三個幾鐘，近清晨四點幾，大東離開夜店，走到街上同班辣妹好好傾，佢仲不停施展冧女口才，令班辣妹呵呵大笑，後來大東同唐禹哲等轉移陣地去唱K。
辯稱忘帶鎖匙
原來早有一班年輕男女喺SOGO附近嘅錢櫃卡拉OK等大東佢哋，其中幾個長髮辣妹不時同大東咬耳仔。唱到朝早7點幾，大東結束一夜狂歡，戲肉原來先真正來臨。佢同其中兩個辣妹步出錢櫃，直到朋友架車駛到門口，佢都同靚女保持距離，上車後朋友將大東同一個着黑背心嘅辣妹送到敦化南路嘅小巷，呢個時候辣妹落車行去家門，大東先施施然落車，然後警覺地四圍望，確定安全先行入屋，佢啲朋友然後開車走。
對於大東跟辣妹返屋企過夜，佢嘅經理人就話當日大東只係唔記得帶鎖匙，唔想嘈醒媽媽，先去朋友屋企逗留，大東經理人話：「那女生跟他真的只是朋友，女生家裏還有室友，不是獨處，下午他就離開了，他也曾因忘帶鑰匙到我家過夜。」
