電車公司想加價五毛，前日引嚟一班網民走上電車抗議「乜都加」。不過電車公司董事總經理、老外夏睿德仲頭痕，法國資金入主咗電車公司18個月，佢諗咗一系列改革措施，想透過減少噪音、加強班次、提高安全系統咁，但係估計未來五年要花五億元去做改善工程。
好似翻新舊車廂，下個月就會向公眾公佈初步設計。不過如果今次加價唔成，資金唔夠，好多改革措施都要拖慢去做。夏睿德噚日仲講笑咁話，如果今次政府唔批准電車加價，好可能佢自己都要走去政府總部示威。法國人生性浪漫，怒火街頭亦好驚人，示威唔似香港咁「和平理性」，面對法式抗爭，真係唔知會有乜後果。