有線電視要向老客戶額外收費，先至供應英超球賽，原本畀晒錢買全套套餐頻道嘅，點都有啲唔順氣。英超唔睇得唔得？冇話唔得嘅，只不過有時心癢難忍，特別係車路士大戰曼聯之時，甚麼黑池對韋根喎，睇唔睇都罷。不過黑池竟然成為英超黑天鵝，新升班就以四比零大勝韋根，好令人驚奇啫。
黑池並非足球新丁，上次踢甲組（今之英超），已係三十九年前之事，老球迷會記得一九六六年英格蘭贏世界盃，隊中一位主將AlanBall，就係於黑池出身嘅。黑池當然仲有一位英國球王，傳奇人物史丹利馬菲斯（StanleyMatthews），在WM式排陣時代，踢右翼，盤球過人隨時一個扭七個，曾來香港比賽，黑池對華聯，馬菲斯一個人就扭到華聯鐵閘司徒堯、劉儀頭暈眼花，話過就過。香港唯一一個到英國踢甲組嘅球員，張子岱就係加盟黑池嘅嘞，七十歲以上嘅老球迷可以提供更多馬菲斯來港掌故！
黑池降班已久，幾乎唔記得咗呢間球會之存在。睇報紙，知道黑池班主都諗唔到會升級，有九十九年歷史嘅球場久未修葺，及至知道升上英超之後，因球場不適宜舉行大型賽事，先至急急維修、裝修，趕唔切英超開鑼，第一場就作客韋根球場比賽，此外，上季升班功臣多數係借將，升級後，借將被原來球會收回，黑池變咗唔夠人用，要到八月十四日開鑼前三日先至一日內簽咗六位球員，以咁嘅陣容，居然贏咗英超立足好幾年嘅韋根四比一，好似係神話中嘅球迷奇遇記，引起左丁山好奇心，幾想睇吓佢作客阿仙奴，究竟仲會唔會創造奇蹟！黑池在英超二十隊之中，球員身價總和排第二十位，但球員身價排第十九位嘅韋根，就俾黑池打扁咗，有時未必係有錢就大晒嘅，不過有錢就梗係好過冇，睇吓車路士大贈送六隻光蛋畀西布朗，就知道成功嘅代價並不便宜。今年落注車路士嘅話，如果對住弱隊可以下注讓球主客，安察洛提知道班主鍾意大勝，會場場下令球員唔准煲魚生粥嘅，與曼聯爭奪冠軍，最後可能以得失球分勝負呢！