香港剩女多，政壇卻缺乏女性。卿姐治下嘅民主黨積極開拓女性市場，今年3月成立性別平等督導小組，向外推動增加女廁格以及女性參選村代表選舉，對內則大搞獎勵計劃招攬女黨員，包括每季發放5,000蚊獎金畀推薦最多女性入黨嘅支部，年終獎金則有3,000蚊，希望重賞之下有勇女，目標係女黨員由目前24.1%升至三成。
商討成立婦女黨團
就連對女職員，民主黨都有優待，喺考慮聘請同升遷問題時，若男女應徵者條件相若，會以平衡兩性比例做優先考慮，換言之都係女性佔優。男職員方面，都有福利，就係有10日有薪侍產假，令男職員可以兼顧家庭生活。
卿姐同八方講，稍後會召集黨內女性區議員同社區主任，商討成立婦女黨團嘅可能性，仲欽點張文光做成員，其他六位立法會男議員相信如釋重負。身為黨內性別平等首席專員嘅黃碧雲會否以身作則參選區議員或立法會？黃碧雲話正認真考慮，但如果有其他合適人選出戰，佢寧願專注做黨內工作。