雲達不來梅喺呢個夏天雖然有主力兼貌似陳冠希嘅靚仔球星奧斯爾轉投皇家馬德里，不過，暫時睇嚟就似乎對球隊嘅場內實力，同埋場外吸引力冇乜大影響；因為喺場內，不來梅前日喺歐聯附首回合，就以3:1擊敗到訪嘅森多利亞，而喺場外，喺呢場波「首球」嘅右閘富斯，仲畀德國小姐選為今屆「德甲先生」㖭！
不來梅啱啱賣走咗喺今夏世界盃踢到曉飛嘅奧斯爾，不過，球隊似乎冇乜受影響，喺前日嘅歐聯附首回合，就憑富斯、芬寧斯同埋比沙路各建一功，以3:1擊敗森多利亞。喺場外，不來梅仲巴閉，喺「德甲先生」選舉中，有兩個球員入咗三甲，除咗比沙路攞第3之外，富斯仲成功奪冠！其實，呢個「德甲先生」選擇，係德國《圖片報》搞嘅，佢哋搵嚟2010年德國小姐夏瑾（AnneJuliaHagen）做評判，喺10強中選出三甲。
10強係邊10名球員？佢哋係拜仁嘅馬里奧高美斯、舒韋恩史汀加、不來梅嘅富斯、比沙路、漢堡嘅艾奧高、哥高加卡、禾夫斯堡嘅費特列治、史浩克嘅魯爾、多蒙特嘅曉姆斯，同埋今夏回流德甲利華古遜嘅中場波歷克。結果，20歲嘅夏瑾選出嘅冠、亞、季依次為富斯、曉姆斯及比沙路。夏瑾話：「我選比沙路得第3，因為佢嘅笑容好吸引，畀人溫暖嘅感覺，一睇就知佢係好男人。至於多蒙特後衞曉姆斯就五官好細緻，仲有一種好高貴嘅氣質。」
「髮型樣貌襯到絕」
對於29歲嘅富斯，夏瑾更加係讚不絕口：「富斯簡直令人眼前一亮，佢好陽光大男孩，又有時尚感，而佢嘅髮型更加同佢嘅清新外形襯到絕！」呢名身高5呎9吋，上圍有35D嘅金髮藍眼靚女，喺做完評判之後，仲話唔排除會搵球星做男朋友。
無論如何，不來梅喺10/11球季都叫做有一個好開始，唔知佢哋可唔可以食住個勢，喺星期六聯賽作客賀芬咸首戰，順利全取3分呢？
富斯小資料
ClemensFRITZ
年齡：29歲
位置：後衞
國籍：德國
身高：1米83
現效球會：雲達不來梅
曾效著名球會：利華古遜
上屆聯賽紀錄：30場入1球
國際賽紀錄：22場入3球