被指因為送機尾發爛渣嘅金管局高層錢曾珙，原訂噚日由吉隆坡返港，八方到場「接機」，可惜原訂嘅下午5點幾國泰機落晒啲客，都未見佢蹤影，一直等到晚黑9點幾鐘，其他航空公司吉隆坡返港航班都降落晒，都唔見呢位發惡高層現身。
提早一日返港
來自赤鱲角消息稱，錢曾珙為咗避開傳媒同埋一班聲稱會到場「接機」嘅地勤，提早一日，前晚漏夜搭馬來西亞航空返咗香港。至於聲稱會到機場「接機」以示不滿嘅國泰地勤噚日亦冇動靜。
國泰空中服務員工會主席黎玉嬋話，因為疑被襲嘅國泰地勤StanleyChan已經報警，地勤人員想低調處理，以免影響調查，所以冇「起義」。
不過，佢話大家仍然支持呢次活動，將製成嘅「shameonyou」貼紙貼喺公司內部嘅櫃枱、儲物櫃等，但好可惜被高層勸喻收起，同事只有無奈撕走。佢希望警方調查可以為同事討回公道。其實，公道自在人心，錢高層如果有道理，冇理由怕向公眾交代吖。