黃曉明噚日戴上價值三十五萬的鑽石頸鏈，喺尖沙嘴活方出席周大福「ShiningMoments．途」相片展，相展主題係人生閃耀嘅時刻，曉明坦言要等自己喺影壇攞到最佳男主角先會到，至於結婚，佢笑指未諗好。講到女友Angelababy（楊穎）會同佢拍電影《神奇》，曉明即大讚Baby係個好演員，仲話：「相信大家是有眼光，有機會的話我也會大力推薦她。」佢又話同Baby拍戲唔會避忌：「我是個不太懂偽裝的人，也越來越覺得只要自己開心就好。」
開腔否認鬧Baby
但講到早前被拍得喺北京痛罵Baby一事，曉明即顯得有點靦腆：「我是這樣的人嗎？他們當編輯太強了，他們可用這賺錢，我可沒這能力，有人想故意這樣說我也沒辦法，挺無奈的。」
自言覺得訂做首飾送人比較有意思嘅曉明，坦言以前唔係太有錢，未試過送女友首飾，問到Baby係咪佢首位獲贈首飾嘅女友？佢甜笑數秒先話：「我不告訴你。」至於早前Baby被指去佢酒店房偷會，曉明只帶笑說謝謝，但當記者問到點解佢兩個見面時總會被記者影到？曉明話：「我也不知道。」
奪最受歡迎獎
何潤東噚日喺台北宣傳《泡沫之夏》，講到黃曉明早排因為戲裏演洛熙，唔夠何潤東嘅歐辰搶風頭而妒忌，後悔演洛熙一角，何潤東話：「聽他這麼說我滿難過的，當初原設定他演歐辰，是他自己決定演洛熙的。身為製作人的我覺得他不適合發表這樣的言論。」何潤東仲讚黃曉明演得好，而曉明經理人話佢哋私底下係好朋友，唔會因此影響友情。
而四川新浪網最近針對暑假受歡迎嘅3部偶像劇《泡沫之夏》、《就想賴著妳》、《一起又看流星雨》投票，結果噚日揭曉，最受歡迎男演員係黃曉明，以354,064票領先何潤東嘅300,904票。