大班鄭經翰同富豪合資搞電台，可惜一直只聞樓梯響，開台無期。八方收到風，中原地產施永青都有興趣搞電台開咪，可能會申請數碼廣播牌照，一旦成事，擁有免費報紙《am730》嘅施老闆，分分鐘成為跨媒體傳媒大亨！
好多人認為喺互聯網世紀，電台係夕陽行業，正是瘦田冇人耕，耕開有人爭，大班呢頭話唔「恨」做，聲言如果政府繼續諸多阻撓，寧願做「地下電台」喺網台開咪；嗰頭施老闆就即時表態有興趣開台。佢同八方講，家未有具體投資計劃，只係「留意吓」階段，「我都係睇咗《蘋果》星期一報道，大班申請數碼廣播牌照，先知道原來政府仲有頻道剩，既然有剩，咪睇吓有冇機會攞個囉」。
「新聞一雞兩味用到」
由於只有三間公司向當局申請數碼廣播頻道，意味日後仲有機會批出新頻道，施老闆話既然頻道冇人爭，相信價錢唔會太高，亦係令佢「留意吓」嘅原因。佢仲話：「開電台成本肯定低過做報紙，我都做過電台節目主持人，呢層我知！」
《am730》創刊五年，據講年年有錢賺，施老闆話免費報紙業務上軌道，所以想開拓新業務，佢話：「家做傳媒個班底，可唔可以做多啲嘢呢？新聞嘅嘢，一雞兩味都用到。」至於法例限制跨媒體擁有呢個關卡，施老闆稱可效法李澤楷，以信託基金持有報紙便可解決，佢名下已有慈善基金，「份報紙有錢賺，注入基金係好事」。
「主婦鍾意聽收音機」
雖然考慮得咁仔細，不過施老闆強調開台十畫未有一撇，路線定位、節目風格未知，至於佢會否開咪，佢言若有憾咁講：「呢樣嘢我老婆實反對，話我冇時間陪佢。」好多人指電台生意難做，搞網台更好，隨時刀仔鋸大樹；施老闆指網台好處係成本低，而且唔受地域限制，「一上網就全球都聽到，又可以下載聽番」，但係網台聽眾層面有限，暫時仍未係主流，「始終唔係一㩒掣就收聽，揸車時聽唔到，好多主婦都係鍾意聽收音機」。因此佢首選做電台，「做開荒牛好辛苦，所以要諗清楚先決定。」
mailto:[email protected]