「樓係要嚟住嘅！」好一句發人深省嘅本周至醒金句，我細細個就信o架喇，不過當你發覺自己可以透過一買一賣實現資本增值的話，樓嘅核心價值就即時改變。媒體發功渲染，發展商舉牌搶貨創天價，會俾人話剃政府眼眉，換轉唔舉牌又會俾旁觀者話聯手玩嘢；假如從善如流，更會俾人話與政府聯手托市，正式係左右做人難，裏外不是人。發展商可以唔睇政府台戲咩？總之聽聽話話，隨時求仁得仁。
理得佢曾財爺係「9招12式」定係「3招14式」，通通都係花招兼虛招。要遏止樓市炒風，首先要追本溯源至問題核心，錢太多時息太低，當資金有如水銀瀉地，執起搵個地方安置都係煩惱。做實業難搵食，要存錢入銀行又俾銀行門口雷曼債券苦主擋住，索性將磚頭掟嚟掟去仲化算。反正股神巴菲特都係錢搵錢，錢搵錢資本增值又唔係罪，與其透過經營實業儲夠一桶金才去入市買嚟住，更多人會選擇直截了當將錢拿去炒買一番。
內地客只佔樓市成交一成
要賺錢總有地方，會德豐地產一日之內就袋咗1億元，有錢人家化整為零轉戰車位，真係要謝天謝地，感謝香港政府打壓樓市，否則大家邊度有機會睇見資金即時靈活轉身嘅好身手。有朋友炒二手樓炒到入上水粉嶺，朝早買晏晝放，隔幾日又要去簽買賣合約，繼續樂此不疲。炒樓已變成小眾極有錢人玩意，香港貧富將更懸殊。以訛傳訛以為內地人買晒香港所有嘅樓，內地客其實只佔本地樓市成交約一成，絕對唔係坊間想像中咁多。
有人仲識驚，亦有人落咗車心思思上番車，故樓市距離爆煲仍然好遠，係因為97年比將軍澳蟹得更甚嘅深井樓價都未見家鄉，當有朝連浪翠嘅樓蟹都得以鬆綁兼夾張牙舞爪，屆時可能才是最壞的時候。具啟示兼代表性嘅指標一個就夠：長實（001）都睇好，邊個仲敢睇淡？
胡孟青
作者為獨立股評人