公民黨湯家驊暈遊西藏，轉到北京休養觀光幾日，平安返港，噚日同記者茶敍。八方見湯大狀容光煥發，一啲都唔似入過廠，更令人思疑佢入藏只係煙幕，上京先係目的地。呢次入藏死過翻生咁滯，湯大狀話其實幾年前做身體檢查時，已發現有心律不正問題，喺西藏唔舒服，由於當地醫生唔清楚佢病歷，因此睇完佢個心電圖後好緊張，話唔容許佢喺西藏出事，否則有負面新聞就弊，所以勒令佢去北京。抵京後湯大狀到長城留影，但原來當日並無上長城，因為佢早年已去過，今次純粹影相，喺北京亦有意外收穫，碰見發展局局長林鄭月娥，仲一齊食早餐。