噚日兩幅官地拍賣成交價都好理想，紅磡灣地皮爭持更加激烈，多個發展商出價，承價超過100口，充份反映發展商未受政府出招打壓樓市影響，仍然看好後市。
好似噚日咁講，拍地成績好係預期之內，市場情緒會穩定番，但唔會對樓市同股市有即時大刺激，業主同買家會進入拉鋸局面，不過如果遲啲再有利好消息，累積嘅購買力會再帶動樓價向上，地產股自然會得益。
農行C輪23580：農業銀行（1288）噚日報收3.37元，升0.6%。農行上市後見過3.60元高位，之後出現調整，近日又有重拾升軌嘅迹象，日內料上試3.43元，破位會再推向3.60元，可以諗吓隻C輪23580。
隻輪現價9.8仙，2011年1月19日到期，行使價3.88元，溢價18%，引伸波幅29.7%，槓桿率34.4倍（有效9.2倍），正股升上3.60元，23580睇17.3仙，升幅逾7成，正股跌穿3.28元就沽咗隻輪。
俊樺