曾為已故「鬼才」填詞人黃霑治癌、家陣又幫華叔對抗癌魔嘅莫樹錦醫生，早前做過電視節目講飲講食，原來佢入到廚房都煮得幾味，噚日參加食神爭霸戰，即場炮製牛肝菌意大利粉，有姿勢又有實際，結果奪得名人組「最受住家食神歡迎獎」。
陳淑莊雞手鴨腳
公民黨陳淑莊都有參賽，佢平時冇時間下廚，加上有個大廚男朋友英雄哥照顧飲食，所以基本上唔使動手都豐衣足食，噚日忽然要煮番幾味，難免有啲雞手鴨腳。陳淑莊參賽嘅係茄汁海鮮意粉，材料簡單，製法容易，佢亦承認選擇煮呢個意粉，係因為失敗機會好低，所以着上圍裙時已經信心十足。
茄汁海鮮意粉睇嚟好容易煮，陳淑莊卻一時大意錯估份量，一次過煮晒成包意大利粉，佢話估唔到會煮咗一大碟出嚟，相信足夠全場人食。評判頒咗個「最佳賣相獎」畀佢。佢自言可以攞埋「身水身汗」獎。明火煮食個爐咁鬼熱，八方入廚都攞到呢個獎啦。