踏入8月，愛國愛黨社團又要張羅10.1慶祝事宜，工商界同胞國慶籌委會噚日開會，請中聯辦高官到場，副主任黎桂康唔得閒，派協調部副部長范瑞方做代表向工商界訓話。
西環幹部訓話主要內容有四點，其一係促請工商界努力做生意，其二係呼籲商家要加強團結合作，並要加強培養年輕一代，努力實現新老交接；另一重點係積極參與國家建設，促進中港交流合作，即係有錢就投資大陸，總之有錢齊齊搵。
以上三點只係前菜，幹部發言主菜，係要工商界加強研究協商，為工商界未來定位早作謀劃。范瑞方指通過政改方案後，對香港政治生態同社會發展會有深刻影響，佢話工商界應加強研究商議，凝聚共識，為工商界未來參與香港經濟、政治同社會事務角色定位早作謀劃。言下之意，似乎係指示商家富豪應準備好參選，唔好旨望再食政治免費午餐。