香港中華煤氣屬下嘅港華燃氣，同江蘇建設高等職業技術學校合作，喺08年四川大地震後，分別喺廣元、綿竹同德陽揀咗30個受災學生，保送佢哋去江蘇修讀煤氣專業課程，兩年理論課加一年實習，其間一個仙都唔使畀。成績最好嗰幾個學生近日嚟咗香港，四日行程主要係玩同埋去中華煤氣參觀。八方噚日同佢哋見過面，個個容光煥發，睇嚟已經走出地震嘅傷痛。其中劉同學胸懷大志，話畢業後會努力工作，目標係成為「全國勞動模範」，博得全場掌聲。佢仲以過來人身份，勉勵舟曲泥石流嘅災民要堅強，「哭泣是脆弱的表現，自己要勇敢的站起來」。