白龍王上月急病入院，住院21日後，日前終於可以返屋企休息，前日劉偉強同陳百祥（阿叻）、黃杏秀及王晶等，專程到泰國參加大法會祈福儀式，可惜白龍王因為病情反覆而缺席。
「有段時間好危險」
噚日阿叻喺將軍澳電視廣播城接受馬時亨同林以諾《以時相聚》節目訪問，阿叻話探過白龍王，但因為白龍王要休息，所以見唔到面，佢話：「我問過醫生佢（白龍王）嘅情況，佢同普通人一樣都要睇醫生，都會插錯喉，佢原先係胃病，因為插錯喉整損咗個肺，所以發炎，有段時間係好危險，家開始好番。」
不過睇到白龍王張近照，個樣比較憔悴，阿叻話：「每個人運氣同使命都會完，唔知係咪呢個時候到。」阿叻咁緊張白龍王，但係佢話自己一啲都唔擔心，佢話：「要發生一定會發生，正如我唔會擔心尹佬同大儍，生老病死幾時完唔重要，凡人都係人，我日日都想死，死唔到，咪要捱囉！」
前日法會由白龍王妻女主持，咁阿叻會唔會繼續支持白龍王嘅妻女？佢話：「師傅仲喺度，我又搵唔到耶穌，我又唔知搵邊個好。我有同佢個女傾過偈，佢受過高深教育，有智慧，咁呢樣嘢係同年紀冇關。」