三個功能組別議員林健峰、梁君彥同梁劉柔芬脫離自由黨，自立門戶變身「經濟動力」，正當其他政黨開始備戰明年區議會選舉之際，佢哋亦有樣學樣想玩直選，林健峰噚日揚言會派出10人以上參選，當中包括一啲現任區議員，包括由自由黨過檔嘅屯門委任區議員羅煌楓，同埋深水埗郭振華。
至於幾個立法會議員會否參選，梁君彥有自知之明，承認佢哋幾個議員贏面都唔大，參選嘅話隨時全軍覆沒，落選事少，輸埋面子事大。
政圈傳出北京重提23條立法，林健峰話未聽聞中央有此任務交畀煲呔，但既然此法遲早要立，幾時舉手都無所謂，更醒條絕世好橋畀政府，話香港人聞23條色變，日後再立法時改稱國家安全法掩人耳目咪得囉。
咁嘅橋都諗得到，真係聰明到冇人有囉。