好友：「我覺得個市仲有得升。未來兩年利息都唔會有得升，買層300零萬嘅中產樓，按揭利率HIBOR加0.8厘，借200零萬，分20年還，每個月都係供萬零蚊。一對夫婦月入如果加埋有3萬零蚊，三分一左右供樓，非常之合情合理。」
淡友A：「你假設對夫婦每個月有3萬零蚊收入，如果佢哋其中一個失業，分幾多年還、幾低息都冇用。要知道，社會不斷轉型，就連大陸出口工業都有危機，香港仲有乜嘢人夠膽講，份工可以一直做落去。」
樓市倘插水 政客勢抽水
淡友B：「日本低息維持咗好多、好多、好多年，又唔見佢哋個樓市救得返？再講，如果唔係外圍環境差，利率又點會一直維持喺低位？家嘅情況，就好似一個重傷嘅人，一支又一支腎上腺素打落去，啲人仲以為呢個七孔流血嘅人可以跑馬拉松。」
好友：「特區政府黑仔，出晒名啦！政府托市，個市就死。政府話要冷卻，個市會點呢？政府出手打擊豪宅，大家咪轉炒中產樓、細價樓囉！過去一段日子，大單位同細單位嘅價錢升幅差唔多，政府點解要針對豪宅呢？講到尾，政府根本冇乜立場，只不過見有人嘈，求其做啲嘢囉。仲有，好似金管局叫銀行非自住物業只借六成。大佬啊，邊有可能執行o架？」
淡友A：「如果連三、四線樓都炒上，就真係好大件事。政府家都係控制吓系統性風險，我又覺得可以接受。」
淡友B：「唔好咁天真啦﹗政府未必有能力做低個市，亦肯定冇能力托市，不過，只要個樓市一死，政府必然大大鑊。迷債苦主三幾萬人，都已經用血橫額文化攻陷中環。如果政府出手之後，樓市就插水，你估啲政客會唔會即刻走出嚟抽水呢？」
利世民
mailto:hkliberty.wordpress.com