談快樂抗爭，街頭藝術家最清楚。劇團於行人專用區表演，商舖抗議阻街；小丑要拋波，差人出手阻撓；惟有笑着享受與世俗抗衡。不犯法尚且如此，要做graffiti（塗鴉）明刀明槍破壞公物，注定塗鴉者要與執法者抗衡。本地塗鴉者曾昭昶（Uncle）卻選擇背道而馳，與官家握手。人家說他被河蟹，他說只希望讓塗鴉Down-to-earthness，「香港發展得太慢，要追上國際級，起碼要五年」。
曾被判刑事損壞罪
30歲人，為啥要自稱Uncle？「中學讀書唔好試過repeat，同學細過我，成日叫我阿叔，咪留個紀念。」自小有繪畫天份，幼稚園已懂得畫公仔生日卡給媽媽，在小學作文經典題目《我的志願》明志，「嗰時經過戲院，外面通常有幅好大嘅繪畫海報，我覺得好靚，好想做戲院海報設計」。
大學視覺傳意系畢業，曾任職平面設計師，01年首次接觸塗鴉即欲罷不能，「住旺角，成日喺後巷見到啲符號，覺得幾靚咪想學吓」。無師自通上網自學，某個晚上，帶着裝備出發，目標為所住屋苑後樓梯，「第一次唔敢走咁遠嘛」。噴上的圖案不難想像：自己名號Uncle簽名。
幼獅嚐過血開始膽大，黑夜潛行日子越來越多，後來終於「斷正」，在九巴上塗鴉被判刑事損壞罪。偷偷摸摸的刺激，難以言喻，但日間上學晚上犯法的無間道生活慢慢讓他生厭。02年在合作夥伴蒲窩青少年中心鼓勵下，他成立了第一支以合法為宗旨的塗鴉隊伍PDWcrew。
終放下心魔向前走
紋身男子投奔官府，記者想到《水滸傳》中的九紋龍史進，「我只係諗有乜嘢方法可以推動塗鴉發展，唔想局限個思維喺合法定唔合法度，我關注嘅係作品靚唔靚，表唔表達到個意思」。從好處看，有了官方令牌，塗鴉場地選擇大增，康文署批准他在指定場地塗鴉創作，屯門警區總部讓他在差館圍牆「畫公仔」；但選擇妥協，除意味須跟從官方規矩，也同時與地下塗鴉界割蓆。
「03、04年嗰陣最頹，抹黑好厲害，只要一提我個名，人哋只會講粗口。」後來經前輩點醒塗鴉是為了自己，才放下心魔向前走。06年見本港塗鴉界發展一池死水，決定北上找突破，發現神州塗鴉界發展方興未艾，「政府仲會配合，好似佢哋成日喺一條水道兩邊噴，啲官員唔會下令洗街，反而將嗰度變作文化景點，呢啲先係真正活化。」
同人唔同命，人家英國最top塗鴉大師Banksy，作品閒閒地賣幾萬英鎊。今年決定全職塗鴉的Uncle，經濟持續受壓，上兩個月幾乎沒錢交租。最近與太古城中心合作，為對方噴了一幅3米×12米的大作，「真係及時雨，應該係接job以來最大嘅一幅，噴到手指痛」。本月底到內地參加國際塗鴉大賽，「如果攞到獎，希望可以谷到graffiti人氣」。對Uncle而言，這條讓街頭塗鴉躋身本港主流藝術殿堂的道路，仍然漫長。
記者 夏志禮