金融海嘯後，唔少賓卡急流勇退，繼金管局前總裁任志剛、副總裁蔡耀君之後，連金管局前助理總裁、現任星展香港行政總裁嘅Amy葉約德，都話會喺年底退休。Amy喺呢個時候退下火線，好多人懷疑關雷曼隻鍋事；不過，據華華所知，行年58嘅Amy，近年一直想退休享受人生，絕對唔係其他人所諗咁複雜。
接替Amy嘅係出身花旗銀行嘅資深銀行家龐華毅（SebastianParedes），佢之前喺花旗做咗20年，應承過檔星展之前，係印尼P.T.BankDanamon主席。除咗龐華毅，星展今次仲挖咗另一位花旗高層過檔，專責新加坡業務，呢位仁兄係金融圈中人好熟悉嘅林森成（SimS.Lim），即係之前花旗香港嘅話事人……照咁睇，星展係咪好快就會新人事、新作風呢？