政府檢討副局長同政治助理表現後決定劃一凍薪，唔少人都覺得凍薪係便宜咗當中表現差嘅人，亦有人為表現好嘅人抱不平。八方發現教育局副局長陳維安係漏網之魚，其實佢喺政界嘅評語唔差，例如試過唔只一次私下落區探訪邊緣青少年，仲叫啲團體唔好叫記者採訪。
身為立法會教育事務委員會主席嘅何秀蘭都同陳維安有唔少合作機會，力撐陳維安表現確實唔差，例如喺遏止書商加價以及調低夜校學費問題都出咗好多力，甚至乎曾經親自探訪夜校學生收集意見，只不過佢冇拉banner話成功爭取，先至被人睇漏眼。八方聽聞陳維安上任後每一星期探訪一間學校，相信喺副局中係異數。