書展同動漫電玩節呢啲暑假重點活動已經告一段落，假期又進入倒數階段，小妹今日介紹多一個節目畀就快開學嘅兄弟姊妹，觀塘apm商場喺今日起至22號，舉辦「apm達人夜書市」，話明對象係年輕潮人，梗係以潮流文化做主題，六個主題區包括電子書、品味生活、創意藝術、漫畫地帶、電玩特區同人氣精品，點計都有一樣啱你啩？
為年輕人作品出書
早排喺會展搞嘅書展就日日人山人海，想企定定打吓書釘都冇位企，今次夜書市有成30個參展商，有成1,200款唔同題材嘅書種，應該可以補番吓數。主辦單位每晚9點後仲會有個開催時段，會揀10本推介書籍以割引價出售，最低去到一折，而且仲有過萬張書券送出，想有着數最好就揀呢個時段去睇睇。
睇書之餘，或者唔少兄弟姊妹都想過吓作家癮，夜書市今年第一次同出版商合作，以「城市潮流文化」為主題，接受年輕人提交作品，入圍嘅作品稍後有機會結集成書出版。
值得一提嘅係，大家去夜書市娛樂消費之餘，仲可以乘機做埋善事。家受泥石流冲擊嘅甘肅舟曲縣災情嚴重，夜書市內會有一個「輸愛慈善大行動」，收集救災捐款同義賣文具同書籍，現場仲會呼籲及收集市民捐出嘅心靈健康同勵志書籍，稍後會轉送畀災區嘅災民，支持佢哋度過難關。
電郵：mailto:[email protected]