帶頭告醫管局嘅怪醫梁家騮，做咗四分一世紀公立醫院醫生之後，終於離巢喺中環名醫集中地開私家檔搵真銀。佢話喺醫管局做埋啲簡單嘢，冇得發揮所長，所以走人，但係會堅持繼續為班醫生兄弟姊妹爭取標準工時。佢新診所位於立法會對面太子大廈，相信日後更易兼顧公職，冇理由唔選多屆啦。
預計10月底開張大吉
八方收到風，梁家騮早兩個月前已經密鑼緊鼓在中環搵舖位，最近終於喺太子大廈租咗個一千呎嘅單位，打算同佢做骨科醫生嘅哥哥梁家騏一齊開檔做外科同骨科。同層有唔少名醫鄰居，好似婦產科何永超，同佢嘅中大舊同學、精神科專科醫生李德誠。騮哥透露搞埋裝修，大約10月底就可以開張大吉。
騮哥係中大第一屆醫科畢業生，86年7月1日正式入威爾斯醫院做醫生，一做24年，與威院同行四分一世紀，佢份人咁長情，點解家至鬆人呢？專做腸癌嘅佢話想接受新挑戰，「我呢幾年喺醫院做嘅嘢好簡單，10年前做嘅嘢，比家複雜好多，發揮唔到專業」。騮哥同醫管局高層鬥法多年，出錢出力打官司，不過佢強調一直以來爭取權益都係對事唔對人，之不過講多兩句都吐吓苦水，話公立醫院手術室唔夠，有時醫生都要等手術室。
行醫廿幾年，騮哥獲得好多公立醫院醫生支持，皆因佢不惜賣5號仔滙豐股票，用自己錢告僱主醫管局，結果醫管局要賠償醫生法定假期返咗工或者候召，公立醫生得到賠償，醫管局主席胡定旭甚至話騮哥搞到醫管局破產，騮哥強調就算日後出嚟掛牌，都唔會就咁放低一直爭取嘅目標，就係要求改善醫療資源不足，公私營失衡問題，同埋會繼續爭取醫生標準工時。
與醫管局官司仲未完
聽到騮哥咁講，相信肥胡又要食定驚風散，騮哥同醫管局索償假期候召官司仲未完，9月高院又見。不過佢承認，醫管局成立廿年以來，公共醫療服務的確有改善。
講到連任，騮哥話兩年後選唔選，家好難講，但係只要有人比佢更有熱誠，做得比佢好，佢一定會讓路。
mailto:[email protected]