差不多要二千元幫架車打一次蠟？似乎貴了點喎！若然話你知是上門到會服務，每架車起碼花10小時以上慢慢逐Part整，而所用的護理配方亦屬獨家自己溝，亮澤度更會用專業儀器測你睇，聽落又覺得物超所值呢！依然半信半疑？記者即場測試了半塊車頭冚，連靚女都驚嘆話：「點解可以滑到咁！」
記者：許維雅
攝影：梁細權
Model：Sukmi
香港人 連洗車都未識
想將舊車變新車，打蠟師傅猶如汽車魔術師可以為車身外殼回復光澤，但市面有好多汽車護理服務都係真正的虛有其表，亮澤一瞬即逝。對汽車美容研究成癡的GoWAX技師Dennis就充滿信心宣稱自家打蠟與別不同，「人哋吃喝玩樂嘅時候，我就上網搜尋世界各地汽車美容嘅新資訊同技術。」Dennis絕對不是得個講字，他所駕來的07年萬事得仍像新車般光亮，全因從事顏色校對工作十年的他，對色澤特別有要求，更熱愛洗車打蠟成癮，慢慢變得專業。
10小時絕不誇張
首創上門到會打蠟不單止為方便車主，真正原因是每次打蠟都起碼花10小時，要放架車在其他地方過夜令車主不安，倒不如上門在停車場整。10小時絕無誇張，即場示範半塊頭冚加一塊沙板都差不多兩個鐘，更經常唔抵得頸越整越多部位，叫極唔停手，連洗車都特別講究，更狠批香港人連車都未識洗，大家唔幫襯都不妨偷吓師啦！
香港人最唔好就係郁啲走去將架車翻噴油，原裝漆根本好難取代，保養先係最重要！
大測試
借來無打理的舊車測試半塊頭冚，只可惜原來頭冚曾翻噴，仲要手工麻麻，令亮度先天不足，用日本Horiba光澤計一測，只得42度，一般新車應有80幾至90度。
步驟1
測溫：先用探熱計檢查車身溫度必須在40℃以下。
步驟2
洗車：洗車最正宗的方法應該要一桶清水及一桶洗車水，先用洗車水洗車，再用清水過污布，避免污泥沙塵再次抹番上車。
清水桶專誠由美國訂，底部有格用來擦污布，幫助隔走海綿上的沙粒及沉底。
步驟3
深層清潔：用泥膠捽走平日洗車洗不走的污迹，如一些鐵粉及瀝青等，「好似女人護膚咁，一定要學識深層清潔才再學保護，否則污垢只會越積越深。」
步驟4
拋光去紋：先用儀器將海綿表面整平，才落拋光劑用打磨機去紋，必須是細小的面積以ZigZag形來回方向去推。
步驟5
封體及上蠟：自己研究溝出來的每層封體物質都唔同，用化妝棉上三至四層封體連結成比較穩定的封體層，隔絕車漆跟空氣的接觸，來增加光澤及通透度的持久性。最後才上一層棕櫚蠟用作保護車漆的最表面。
效果令立立
Dennis每次幫人客做完都會再用光澤計測光保證亮度，唔只靠肉眼睇咁兒戲。
GoWAX專業汽車美容
護理套餐：$1,880起
查詢：96708963/60331320