香港官商勾結咁嚴重，政策又傾斜，大財團自然成為狙擊對象，呢啲唔係「仇富」，係「仇不義之富」。
同發展商對着幹
噚日就有個叫「監察會德豐關注組」嘅民間團體，走去銅鑼灣時代廣場踩場，搞咗個「踢爆官商勾結嘉年華」，又玩攤位遊戲，又吹vuvuzela，要控訴「會德豐10宗罪」。發起人譚香文話，會德豐旗下嘅多個樓盤用料差，單位滲漏又拖延維修；旗下有線電視又以不良手法人簽約，罪狀罄竹難書。
譚香文本身係會德豐旗下樓盤鑽石山星河明居嘅業主會主席，成日同發展商對着幹，家仲搞埋個監察會德豐關注組，睇嚟呢條水佢有排食。
個嘉年華又搵嚟「快必」做主持，嘻笑怒罵諷刺會德豐。嘉年華嘅重頭戲係「踢爆奸商」遊戲，射爆龍門嘅市民都獲紀念品一份。